Mae Cystadleuaeth Sgiliau Cymru wedi gweld niferoedd anhygoel yn cofrestru, ac wedi torri'r record efo 1,649 o bobl ifanc yn cofrestru ar gyfer y cystadlaethau yn Ionawr a Chwefror y flwyddyn nesaf.
Nod Cystadleuaeth Sgiliau Cymru yw codi proffil sgiliau yng Nghymru ac mae'n cynnig cyfle i fyfyrwyr, hyfforddeion, a phrentisiaid herio, meincnodi a chodi eu sgiliau trwy gymryd rhan mewn cystadlaethau ar draws ystod o sectorau.
Wedi'i ariannu gan Lywodraeth Cymru a'i redeg gan rwydwaith ymroddedig o golegau, darparwyr dysgu seiliedig ar waith a sefydliadau a arweinir gan gyflogwyr, mae'n cynnwys cyfres o gystadlaethau sgiliau lleol, sy'n cyd-fynd â WorldSkills ac anghenion economi Cymru.
Mae’r cystadlaethau’n cwmpasu meysydd sgiliau ar draws pum sector sy’n cynnwys: Adeiladu a Seilwaith, Peirianneg a Thechnoleg, Iechyd, Lletygarwch a Ffordd o Fyw, TG a Menter, y Cyfryngau a Chreadigol.
Dywedodd Cyfarwyddwr Prosiect ISEiW, Paul Evans: “Rydym wrth ein bodd bod cymaint o bobl ifanc eisiau bod yn rhan o CSC eleni, a bod manteision cystadlaethau sgiliau i’w gweld yn glir gan y rhai nid yn unig yn y sector addysg.”
Eleni, bydd Cystadleuaeth Sgiliau Cymru yn cynnwys sawl cystadleuaeth newydd fel Sgiliau Cynhwysol: Sgiliau Bywyd, a gyhoeddwyd yn gynharach eleni. Cynlluniwyd y gystadleuaeth hon i greu cyfleoedd cystadleuol i ddysgwyr ag Anghenion Dysgu Ychwanegol sydd â chyrchfan arfaethedig o fyw â chymorth/byw’n annibynnol. Ers ei chyflwyno'n ddiweddar, mae'r gystadleuaeth wedi bod yn boblogaidd, gyda chyfanswm o 24 o gofrestriadau.
Mae Ynni Adnewyddadwy yn argraffiad newydd arall i bortffolio CSC. Mae’r gystadleuaeth hon yn dangos yr ymateb gan addysg i sector blaenoriaeth, a bydd yn gystadleuaeth tîm a fydd yn ymchwilio i sut y gall technolegau amrywiol o fewn y sector technoleg werdd ddarparu ynni ar gyfer cartrefi a diwydiant. Canolbwyntio ar bynciau allweddol fel tyrbinau gwynt, solar ffotofoltäig, dyfeisiau llanw, tyrbinau dŵr a hydrogen. Bydd 40 o unigolion yn cymryd rhan o fewn 8 tîm, gyda’r enillwyr yn cael eu coroni’n bencampwyr y gystadleuaeth ynni adnewyddadwy gyntaf un yng Nghymru.
Cynhelir y cystadlaethau ddiwedd Ionawr a dechrau Chwefror 2023, gan ddod i ben gyda Digwyddiad Dathlu ar 9 Mawrth i arddangos llwyddiannau’r holl gystadleuwyr.
I gael gwybod mwy am CSC, cliciwch yma